ചരിത്ര നേട്ടവുമായി ഇന്ത്യൻ ഓഹരിവിപണി; സെൻസെക്സ് 300 പോയിൻറുകൾ‌ ഉയർന്ന് 50,000 കടന്നു

മുംബൈ: ഇന്ത്യൻ ഓഹരി വിപണിയുടെ ചരിത്രത്തിൽ ആദ്യമായി സെൻസെക്​സ്​ 50,000 പോയന്‍റ്​ കടന്നു. 300 പോയന്റുകളോളം ഉയർന്ന്​ 50126.73 പോയിന്‍റിൽ എത്തുകയായിരുന്നു. നിഫ്​റ്റിയും ആദ്യമായി 14,700 പോയന്‍റ്​ കടന്ന് നേട്ടമുണ്ടാക്കിയിട്ടുണ്ട് .

ബജാജ് ഫിൻസേർവ് , ബജാജ് ഫിനാൻസ് , റിലയൻസ്​ ഇൻഡ്​ട്രീസ് തുടങ്ങിയവ ഓഹരി വിപണിയിൽ വ്യാഴാഴ്ച നേട്ടം കൊയ്​ത ഭീമൻമാരിൽ ചിലരാണ്. ഇൻഡസ് ഇന്റ് , ആക്സിസ് ബാങ്കുകളും നേട്ടമുണ്ടാക്കിയവരുടെ പട്ടികയിലുണ്ട്. കൊവിഡ്​ ഭീതി ഒഴിഞ്ഞതോടെയാണ്​ കുതിച്ചുചാട്ടമെന്നാണ്​ വിലയിരുത്തൽ.

‘ആഗോള സൂചനകൾ കണക്കിലെടുത്താൽ ആഭ്യന്തര ഓഹരികൾ മികച്ചതായിരിക്കുമെന്നു പ്രതീക്ഷിക്കാം’, എന്നാണ് റിലയൻസ് സെക്യൂരിറ്റീസിന്റെ സ്ട്രാറ്റജി ഹെഡ് ആയ ബിനോദ് മോദി അഭിപ്രായപ്പെടുന്നത്. രാജ്യത്ത് നടക്കുന്ന കൊവിഡ് പ്രതിരോധ കുത്തിവെപ്പും സമ്പദ്‌വ്യവസ്ഥക്ക് ലഭിച്ചിരിക്കുന്ന ചെറിയ തോതിലുള്ള ഉണർവ്വും ഓഹരി-സാമ്പത്തിക രംഗത്തിന് ഉത്തേജനം പകരാൻ സാധ്യതയുണ്ടെന്ന് അദ്ദേഹം സൂചിപ്പിച്ചു.

‘കൂടാതെ ആഗോളതലത്തിൽ പുറപ്പെടുവിപ്പിച്ചിട്ടുള്ള അനുകൂല ധനനയങ്ങൾ‌, ഡോളറിന്റെ ദുർബല അവസ്ഥ എന്നിവയെല്ലാം ആഭ്യന്തര ഓഹരികളിൽ‌ ഗുണപരമായി പ്രതിഫലിക്കുമെന്ന് പ്രതീക്ഷിക്കപ്പെടുന്നത് ‘, അദ്ദേഹം കൂട്ടിച്ചേർക്കുന്നു.

രാജ്യത്ത്​ വാക്​സിൻ വിതരണം ആരംഭിച്ചത് കൂടാതെ ​യു.എസ്​ പ്രസിഡന്‍റായി ജോ ബൈഡൻ അധികാരമേറ്റതും ഇന്ത്യൻ വിപണിയുടെ പ്രതീക്ഷക്ക്​ ആക്കം കൂട്ടി. യു.എസ്​ -ചൈന വ്യാപാരയുദ്ധത്തിന്​ അയവു വരുമെന്ന നിഗമനവും വിപണി​ക്ക്​ ആവേശമായിട്ടുണ്ടെന്ന് കണക്കാക്കപ്പെടുന്നു. ബജറ്റിൽ സമ്പദ്​വ്യവസ്​ഥയെ കരകയറ്റുന്ന പ്രഖ്യാപനങ്ങളുണ്ടായേക്കാമെന്ന പ്രതീക്ഷയും വിപണിക്ക്​ നേട്ടമായി.