നാരദമഹര്‍ഷി പഴയകാലത്തിന്റെ ഗൂഗിള്‍, ലോകത്തെ എല്ലാ കാര്യങ്ങളും അറിയാമായിരുന്നു: ഗുജറാത്ത് മുഖ്യമന്ത്രി വിജയ് രൂപാണി

വിജയ് രൂപാനി

അഹമ്മദാബാദ്: പുരാണകഥാപാത്രം നാരദ മഹര്‍ഷിയെ ഇന്റര്‍നെറ്റ് സെര്‍ച്ച് എഞ്ചിനായ ഗൂഗിളിനോട് ഉപമിച്ച് ഗുജറാത്ത് മുഖ്യമന്ത്രി വിജയ് രൂപാണി. നാരദരുടെ അറിവിന്റെ വ്യാപ്തി വ്യക്തമാക്കുന്നതിന് വേണ്ടിയായിരുന്നു ഈ ഉപമ.

നാരദമഹര്‍ഷിക്ക് ഗൂഗിളിനെ പോലെ ലോകത്തെ എല്ലാക്കാര്യങ്ങളെക്കുറിച്ചും അറിവുണ്ടായിരുന്നെന്ന് രൂപാണി പറഞ്ഞു. വിശ്വസംവാദ് കേന്ദ്രം സംഘടിപ്പിച്ച ദേവര്‍ഷി നാരദ ജയന്തി ആഘോഷത്തില്‍ സംസാരിക്കുകയായിരുന്നു അദ്ദേഹം.

ഗൂഗിള്‍ എല്ലാ വിവരങ്ങളുടെയും സ്രോതസാണ്, നാരദ മഹര്‍ഷിയെ പോലെ. കാരണം ലോകത്ത് നടക്കുന്ന എല്ലാ കാര്യങ്ങളെക്കുറിച്ചും അദ്ദേഹത്തിന് അറിവുണ്ടായിരുന്നു. രൂപാണി പറഞ്ഞു.

“നാരദര്‍ ഒരുപാട് അറിവുള്ള മനുഷ്യനായിരുന്നു എന്നത് ഇന്നത്തെക്കാലത്ത് പ്രാധാന്യമുള്ളതാണ്. അദ്ദേഹത്തിന് ലോകത്തെ മുഴുവന്‍ കാര്യങ്ങളെ കുറിച്ചും അറിവുണ്ടായിരുന്നു. ഈ വിവരങ്ങളുടെ അടിസ്ഥാനത്തിലായിരുന്നു അദ്ദേഹം പ്രവര്‍ത്തിച്ചിരുന്നത്. മനുഷ്യകുലത്തിന്റെ നന്‍മയ്ക്ക് വേണ്ടി വിവരങ്ങള്‍ ശേഖരിക്കുക എന്നതായിരുന്നു അദ്ദേഹത്തിന്റെ ധര്‍മം. അത് വളരെ അനിവാര്യവുമായിരുന്നു”. അദ്ദേഹം കൂട്ടിച്ചേര്‍ത്തു.

ത്രിപുര മുഖ്യമന്ത്രി ബിപ്ലബ് കുമാര്‍ ദേവിന്റെ തുടര്‍ച്ചയായ പരിഹാസ്യ പ്രസ്താവനകള്‍ക്ക് പിന്നാലെയാണ് വിജയ് രൂപാണിയുടെ പ്രസ്താവന എത്തിയിരിക്കുന്നത്. വിവാദ പ്രസ്താവനകളുടെ പേരില്‍ ബിപ്ലബിനെ പ്രധാനമന്ത്രി ദില്ലിക്ക് വിളിപ്പിച്ചിരിക്കുകയാണ്. മഹാഭാരതകാലത്ത് ഇന്റര്‍നെറ്റ് ഉണ്ടായിരുന്നു, ലോകസുന്ദരി ഡയാന ഹെയ്ഡന്‍ ഇന്ത്യന്‍ സൗന്ദര്യസങ്കല്‍പ്പത്തിന്റെ പ്രതീകമല്ല, സിവില്‍ എഞ്ചിനീയര്‍മാര്‍ സിവില്‍ സര്‍വീസില്‍ ചേരണം, യുവാക്കള്‍ സര്‍ക്കാര്‍ ജോലി നോക്കിയിരിക്കാതെ മുറുക്കാന്‍ കടയോ പശുവളര്‍ത്തലോ തുടങ്ങണം ഇങ്ങനെ നീളുന്നു ബിപ്ലബ് ദേവിന്റെ വിവാദ പരാമര്‍ശങ്ങള്‍.

ഈ ദിവസം നിങ്ങള്‍ക്ക് എങ്ങനെ? സൗജന്യമായി അറിയാന്‍ ഇവിടെ ക്ലിക്ക് ചെയ്യുക

DONT MISS
Top