“വില്ലന്‍ സിനിമയില്‍ അഭിനയിക്കേണ്ടിയിരുന്നില്ല, അഭിപ്രായം പറഞ്ഞാല്‍ പ്രൊമോഷനാണെന്ന് ധരിച്ചാലോ!”, സിദ്ദിഖ് പറയുന്നു

ബി ഉണ്ണികൃഷ്ണന്‍ മോഹന്‍ലാലിനെ നായകനാക്കി സംവിധാനം ചെയ്ത വില്ലന്‍ തിയേറ്ററുകളില്‍ മുന്നേറുന്നതിനിടയില്‍ ഒട്ടേറെ പേര്‍ ചിത്രത്തെ പ്രശംസിച്ച് രംഗത്തെത്തിയിരുന്നു. ഒരു അഭിനേതാവെന്ന നിലയില്‍ തനിക്ക് ഏറ്റവും സംതൃപ്തി നല്‍കിയ കഥാപാത്രമാണ് മാത്യു മാഞ്ഞൂരാനെന്ന് നടന്‍ മോഹന്‍ലാലും പ്രതികരിച്ചിരുന്നു. ഏറ്റവും ഒടുവില്‍ ചിത്രത്തെ പ്രശംസിച്ച് നടന്‍ സിദ്ധിഖ് രംഗത്തെത്തിയിരിക്കുകയാണ്. തന്റെ ഫെയ്‌സ്ബുക്ക് പേജിലാണ് സിദ്ധിഖിന്റെ പ്രതികരണം.

വില്ലന്‍ സിനിമയില്‍ അഭിനയിക്കേണ്ടിയിരുന്നില്ല എന്ന് പറഞ്ഞ് തുടങ്ങുന്ന സിദ്ധിഖ് അഭിനയിച്ചില്ലായിരുന്നെങ്കില്‍ ഈ സിനിമയേക്കുറിച്ചു തനിക്ക്  അഭിപ്രായം തുറന്നു പറയാമായിരുന്നുവെന്നും പറയുന്നു. താന്‍ അഭിനയിച്ചതുകൊണ്ടുതന്നെ എന്ത് അഭിപ്രായം പറഞ്ഞാലും അത് സിനിമയെ പ്രൊമോട്ട് ചെയ്യാനാണെന്നേ എല്ലാവരും കരുതുകയുള്ളൂവെന്നും സിദ്ധിഖ് പറയുന്നു.

താന്‍ ഈ അടുത്തകാലത്തു കണ്ടതില്‍ തനിക്ക് ഏറ്റവും ഇഷ്ടപെട്ട സിനിമയാണ് വില്ലന്‍. വ്യക്തി ബന്ധങ്ങളുടെ ആഴങ്ങള്‍ ഈ സിനിമ നമുക്ക് കാണിച്ചു തരുന്നു. മോഹന്‍ലാലും മഞ്ജുവും, ഞാനും മോഹന്‍ലാലും, വിശാലും ഹന്‍സികയും ഒക്കെ തമ്മിലുള്ള ബന്ധങ്ങള്‍ക്ക് എന്തൊരു ദൃഢതയാണ്. ഒരാള്‍ മറ്റൊരാള്‍ക്കു വേണ്ടി ചെയ്യുന്ന ത്യാഗങ്ങള്‍, കരുതലുകള്‍ ഒക്കെ എത്ര ഭംഗിയായിട്ടാണ് ഈ ചിത്രത്തില്‍ ആവിഷ്‌കരിച്ചിരിക്കുന്നത്.

നമ്മുടെ സാമാന്യ യുക്തിക്കു നിരക്കാത്ത ഒരു സസ്പെന്‍സിലൂടെ പ്രേക്ഷകരെ ഞെട്ടിക്കാന്‍ സംവിധായകന്‍ ശ്രമിച്ചിട്ടില്ല എന്നത് ഒരു പോരായ്മയായി എനിക്ക് തോന്നിയില്ല. സ്വപ്നലോകത്തു നിന്ന് ഇറങ്ങി വന്ന് നമ്മളെ കൊണ്ട് കയ്യടിപ്പിച്ചു കടന്നു പോകുന്ന ഒരു നായകന്‍ ഈ ചിത്രത്തിലില്ല. പകരം ജീവിത യാഥാര്‍ത്ഥ്യങ്ങള്‍ കണ്ട് പതം വന്ന ഒരു സാധാരണ മനുഷ്യന്‍ മാത്രമാണ് ഇതിലെ നായകന്‍.

ജീവിതത്തില്‍ ഒരാള്‍ അനുഭവിക്കേണ്ടി വരുന്ന തീക്ഷ്ണമായ വേദന മഞ്ജു വാരിയര്‍ എന്ന അഭിനേത്രിയുടെ ഒരു കണ്ണിലൂടെ നമുക്ക് കാണാം. നന്നായി അഭിനയിക്കുമ്പോഴല്ല അഭിനയിക്കാതിരിക്കുമ്പോഴാണ് ഒരു നടന്‍ നല്ല നടനായി മാറുന്നതെന്ന് മലയാളിയെ മനസിലാക്കി തന്ന മോഹന്‍ലാല്‍, ഒരു നടന്‍ എന്ന നിലയ്ക്ക് ഞാന്‍ ഇനി എന്തെല്ലാം പഠിക്കാനിരിക്കുന്നു എന്ന് ഈ ചിത്രത്തിലൂടെ എന്നെ ബോധ്യപ്പെടുത്തുന്നു.

സാങ്കേതികത്തികവില്‍ മലയാള സിനിമ മറ്റു ഭാഷാ ചിത്രങ്ങളോട് മത്സരിക്കാന്‍ തുടങ്ങിയിരിക്കുന്നു എന്ന് ഈ ചിത്രം ഓര്‍മ്മിപ്പിക്കുന്നു. തുടക്കത്തില്‍ ഞാന്‍ പറഞ്ഞ വാക്കുകള്‍ മാറ്റി പറയുന്നതില്‍ എന്നോട് ക്ഷമിക്കണം. ഈ ചിത്രത്തിന്റെ ഭാഗമാകാന്‍ കഴിഞ്ഞതില്‍ ഞാന്‍ അഭിമാനിക്കുന്നു. കാരണം വില്ലന്‍ ബി ഉണ്ണിക്കൃഷ്ണന്റെയൊ , മോഹന്‍ലാലിന്റെയൊ വിശാലിന്റെയൊ മാത്രം സിനിമയല്ല, എന്റെയും കൂടിയല്ലേ. സിദ്ധിഖ് പറയുന്നു.

ഈ ദിവസം നിങ്ങള്‍ക്ക് എങ്ങനെ? സൗജന്യമായി അറിയാന്‍ ഇവിടെ ക്ലിക്ക് ചെയ്യുക

DONT MISS
Top