മുറി ഒഴിവില്ലെന്ന് ഹോട്ടല്‍ അധികൃതര്‍; തെരുവില്‍ സ്വന്തം പ്രതിമയ്ക്കു താഴെയുറങ്ങുന്ന അര്‍നോള്‍ഡിന്റെ ചിത്രം വൈറലാകുന്നു

കാലിഫോര്‍ണിയ: ഹോളിവുഡ് നടനും മുന്‍ കാലിഫോര്‍ണിയ ഗവര്‍ണറുമായ അര്‍നോള്‍ഡ് ഷ്വാസ്‌നഗെര്‍ തെരുവില്‍ കിടന്നുറങ്ങുന്ന ചിത്രം സോഷ്യല്‍ മീഡിയയില്‍ വൈറലാകുന്നു. ഹോട്ടലില്‍ മുറി ലഭിക്കാത്തതിനെത്തുടര്‍ന്നാണ് അര്‍നോള്‍ഡ് കാലിഫോാര്‍ണിയയിലെ തെരുവില്‍ സ്വന്തം വെങ്കല പ്രതിമയ്ക്ക് താഴെ ഉറങ്ങിയത്. മുന്‍കൂട്ടി ബുക്ക് ചെയ്യാത്തതിനാല്‍ അര്‍നോള്‍ഡിന് ഹോട്ടലില്‍ മുറി ലഭിച്ചില്ല. പിന്നീട് ജീവനക്കാരുമായുള്ള വാഗ്വാദത്തെത്തുടര്‍ന്ന് തെരുവിലുറങ്ങാന്‍ തീരുമാനിക്കുകയായിരുന്നു.

കൈവെച്ച മേഖലകളിലെല്ലാം എന്നും ഒന്നാമനായ ചരിത്രമാണ് അര്‍നോള്‍ഡിനുള്ളത്. ബോഡിബില്‍ഡിങ്ങിലും സിനിമയിലും രാഷ്ട്രീയത്തിലുമൊക്കെ ഈ മസില്‍മാനെ വെല്ലാന്‍ ആരുമുണ്ടായിരുന്നില്ല. എന്നിട്ടും അര്‍നോള്‍ഡിനെപ്പോലെ പ്രശസ്തനായൊരാള്‍ മറ്റൊരു ഹോട്ടല്‍ അന്വേഷിക്കാതെ തെരുവിലുറങ്ങാന്‍ തീരുമാനിച്ചത് എന്തുകൊണ്ടാണെന്ന് സോഷ്യല്‍ മീഡിയയില്‍ പലരും സംശയമുന്നയിച്ചു.

എന്നാല്‍ നല്ല സമയത്ത് കൂടെ നില്‍ക്കുകയും മോശം സമയത്ത് ഉപേക്ഷിക്കുകയും ചെയ്യുന്ന മനുഷ്യരുടെ സ്വഭാവത്തില്‍ വേദന തോന്നിയാണ് മറ്റ് ഹോട്ടലുകള്‍ അന്വേഷിക്കാതെ തെരുവിലുറങ്ങാന്‍ തീരുമാനിച്ചതെന്ന് അര്‍നോള്‍ഡിനോട് അടുത്ത വൃത്തങ്ങള്‍ വ്യക്തമാക്കി.

അര്‍നോള്‍ഡ് കാലിഫോര്‍ണിയ ഗവര്‍ണറായിരുന്ന കാലയളവില്‍ ഏതു സമയത്ത് വന്നാലും മുറി അനുവദിക്കുമെന്ന് ഹോട്ടല്‍ അധികൃതര്‍ അര്‍നോള്‍ഡിന് ഉറപ്പ് നല്‍കിയിരുന്നു. എന്നാല്‍ കഴിഞ്ഞ ദിവസം ഹോട്ടലിലെത്തിയ അര്‍നോള്‍ഡിന് മുന്‍കൂട്ടി ബുക്ക് ചെയ്തില്ലെന്ന കാരണത്താല്‍ ഹോട്ടല്‍ അധികൃതര്‍ മുറി നിഷേധിക്കുകയായിരുന്നു. ഇതാണ് അര്‍നോള്‍ഡിനെ വേദനിപ്പിച്ചത്.

തന്റെ തന്നെ പ്രതിമയ്ക്ക് താഴെ തെരുവിലുറങ്ങുന്ന ചിത്രം അര്‍നോള്‍ഡ് തന്നെയാണ് സോഷ്യല്‍ മീഡിയയില്‍ പോസ്റ്റ് ചെയ്തത്. പേരും പ്രശസ്തിയും ഉള്ള സമയത്ത് കൂടെ നിന്നവര്‍ അത് നഷ്ടപ്പെടുമ്പോള്‍ ഉപേക്ഷിക്കുമെന്നും അര്‍നോള്‍ഡ് പറയുന്നു.

ഈ ദിവസം നിങ്ങള്‍ക്ക് എങ്ങനെ? സൗജന്യമായി അറിയാന്‍ ഇവിടെ ക്ലിക്ക് ചെയ്യുക

DONT MISS
Top