കശ്മീരില്‍ ഭീകരപ്രവര്‍ത്തനങ്ങള്‍ക്കായി ഒസാമ ബിന്‍ ലാദനില്‍ നിന്നും നവാസ് ഷെരീഫ് പണം സ്വീകരിച്ചതായി വെളിപ്പെടുത്തല്‍; ഷെരീഫിനെതിരെ ഇമ്രാന്‍ ഖാന്‍ നിയമനടപടിയ്ക്കൊരുങ്ങുന്നു

ഒസാമ ബിന്‍ ലാദന്‍, നവാസ് ഷെരീഫ് (ഫയല്‍ ചിത്രം)

ഇസ്ലാമാബാദ് : കശ്മീരിലും അഫ്ഗാനിസ്ഥാനിലും ഭീകരപ്രവര്‍ത്തനങ്ങള്‍ ശക്തമാക്കുന്നതിനായി നവാസ് ഷെരീഫ് അല്‍ഖ്വയ്ദ തലവനായിരുന്ന ഒസാമ ബിന്‍ ലാദനില്‍ നിന്നും വന്‍തുക സ്വീകരിച്ചതായി വെളിപ്പെടുത്തല്‍. പാക് ചാരസംഘടനയായ ഐഎസ്‌ഐയുടെ മുന്‍ ചാരന്‍ ഖാലിദ് ഖവാജയുടെ ഭാര്യ ഷമാമ ഖാലിദ് പുറത്തിറക്കിയ പുസ്തകത്തിലാണ് ഈ വെളിപ്പെടുത്തല്‍.

ഭീകരവാദം പ്രോല്‍സാഹിപ്പിക്കാന്‍ 1980 കളുടെ അവസാനമാണ് നവാസ് ഷെരീഫ്, ബിന്‍ ലാദനില്‍ നിന്നും പണം കൈപ്പറ്റിയത്. ഏതാണ്ട് 1.5 ബില്യണ്‍ തുകയാണ് ജിഹാദി പ്രവര്‍ത്തനങ്ങള്‍ക്കായി സ്വീകരിച്ചതെന്നും പുസ്തകം വെളിപ്പെടുത്തുന്നു.

1989 ല്‍ ബേനസീര്‍ ഭൂട്ടോയുടെ നേതൃത്വത്തിലുള്ള സര്‍ക്കാരിനെ അസ്ഥിരപ്പെടുത്താനും ഈ പണം വിനിയോഗിച്ചതായി ആരോപണമുണ്ട്. ലാദന്‍ നല്‍കിയ പണത്തില്‍ നിന്നും 270 ദശലക്ഷം രൂപ ബേനസീര്‍ സര്‍ക്കാരിനെ അട്ടിമറിയ്ക്കാനും വിനിയോഗിച്ചെന്ന് മുന്‍ ക്രിക്കറ്റ് താരം ഇമ്രാന്‍ഖാന്റെ രാഷ്ട്രീയപാര്‍ട്ടിയായ പാകിസ്താന്‍ തെഹ്‌രീക് ഇ ഇന്‍സാഫ് ആരോപിച്ചു.

പുസ്തകത്തിലെ വെളിപ്പെടുത്തലിന്റെ പശ്ചാത്തലത്തില്‍ നവാസ് ഷെരീഫിനെതിരെ നിയമനടപടിയ്ക്ക് ഒരുങ്ങുകയാണ് ഇമ്രാന്‍ ഖാന്‍. ഇതുസംബന്ധിച്ച് നിയമവിദഗ്ധരുമായി കൂടിയാലോചനകള്‍ തുടര്‍ന്നുവരികയാണെന്ന് പാകിസ്താന്‍ തെഹ്‌രീക് ഇ ഇന്‍സാഫ് വക്താവ് ഫവാദ് ചൗധരി വ്യക്തമാക്കി. വിദേശശക്തികളില്‍ നിന്നും പണം കൈപ്പറ്റി രാജ്യത്തെ ജനാധിപത്യം അട്ടിമറിയ്ക്കാന്‍ നവാസ് ഷെരീഫ് കൂട്ടുനില്‍ക്കുകയായിരുന്നെന്ന് ഫവാദ് കുറ്റപ്പെടുത്തി.

2010 ല്‍ പാകിസ്താനി താലിബാന്റെ ആക്രമണത്തിലാണ് പാക് ചാരസംഘടനയായ ഐഎസ്‌ഐയുടെ ചാരനായിരുന്ന ഖാലിദ് ഖവാജ കൊല്ലപ്പെടുന്നത്.

ഈ ദിവസം നിങ്ങള്‍ക്ക് എങ്ങനെ? സൗജന്യമായി അറിയാന്‍ ഇവിടെ ക്ലിക്ക് ചെയ്യുക

DONT MISS
Top