‘വേദനിച്ചപ്പോള്‍ ഒരു പച്ചമനുഷ്യനായി പ്രതികരിച്ചുപോയതാണ്, അത് ജാഡയോ അഹങ്കാരമോ അല്ല’ ആരാധകരോട് ക്ഷമ ചോദിച്ച് ടോവിനോ തോമസ്

താരങ്ങള്‍ക്ക് ഹേറ്റേഴ്‌സ് ആരാധകരുടെ ഏറ്റുമുട്ടലിലൂടെയാണ് ഉണ്ടാവുന്നതെങ്കില്‍ ടോവിനോ തോമസ് ഹേറ്റേഴ്‌സിനെ സ്വന്തമായി ഉണ്ടാക്കുന്നുവെന്നായിരുന്നു അടുത്തിടെ ട്രോളന്മാര്‍ സോഷ്യല്‍ മീഡിയയില്‍ ഹിറ്റാക്കിയ ഒരു പരിഹാസം. മെക്‌സിക്കന്‍ അപാരത എന്ന ചിത്രം വമ്പന്‍ ഹിറ്റിലേക്ക് കുതിക്കുന്നതിനിടെ ഒരു സ്വീകരണത്തില്‍ തന്നെ ആരോ തല്ലിയിട്ടു പോയി എന്ന ടോവിനോയുടെ ബഹളവും ഒച്ചപ്പാടുമായിരുന്നു ഈ പരിഹാസത്തിന് കാരണവും. സിനിമാ തീയറ്ററില്‍ പിച്ചിയെന്ന് പറഞ്ഞ്, ബഹളം വെക്കുകയും തെറി വിളിക്കുകയും ചെയ്തതിനു പിന്നാലെയായിരുന്നു ഈ സംഭവവും. ഇതോടെ  ടോവിനോയ്‌ക്കെതിരെ വലിയ വിമര്‍ശനവും ഉയര്‍ന്നു.

മെക്‌സിക്കന്‍ അപാരതയുടെ പ്രചരണത്തിനിടെയായിരുന്നു സംഭവം.  ടോവിനോയും രൂപേഷ് പീതാംബരനും ഉള്‍പ്പെടെയുള്ളവര്‍. കാറില്‍ നിന്ന് കാണികളെ അഭിവാദ്യം ചെയ്യുന്നതിനിടെ, ഒരാള്‍ തന്നെ തല്ലിയെന്നാണ് ടോവിനോയുടെ ആരോപണം. ഇതേത്തുടര്‍ന്ന് അയാളെ പിടിക്കാന്‍ ടോവിനോ ആവശ്യപ്പെടുന്നു. സ്‌നേഹം കൊണ്ട് ഒന്ന് തൊട്ടതാകാമെന്ന് ചുറ്റുമുള്ളവര്‍ പറയുന്നുണ്ടെങ്കിലും, താരം വിഷയത്തില്‍ പിണങ്ങി കാറിലിരിക്കുന്നു. അയാളെന്തിനാണ് തല്ലിയതെന്ന് ചോദിക്കണമെന്നും എന്നിട്ടേ താന്‍ പുറത്തേക്കുള്ളൂവെന്നും താരം വിളിച്ചുപറയുന്ന വീഡിയോ ദൃശ്യങ്ങള്‍ സോഷ്യല്‍ മീഡിയയില്‍ പ്രചരിച്ചതോടെ വിമര്‍ശനങ്ങള്‍ക്ക് ശക്തിയും കൂടി.

വീഡിയോയില്‍ താരത്തെ അടിക്കുന്നതൊന്നും കാണാനാകുന്നില്ലെന്നാണ് ആരാധകര്‍ പറയുന്നത്. ഒന്ന് തൊടുക മാത്രമാണ് ചെയ്തതെന്ന് സ്‌ക്രീന്‍ ഷോട്ടിന്റെയും വീഡിയോയുടെയും സഹായത്തോടെ നവമാധ്യമങ്ങള്‍ സമര്‍ത്ഥിക്കുന്നു. എന്നാല്‍ മൂക്കില്‍നിന്നും വായില്‍ നിന്നും ചോരയൊലിപ്പിച്ച് കിടക്കുന്ന മാതൃകയിലാണ് താരത്തിന്റെ പ്രകടനമെന്നും വിമര്‍ശനമുണ്ട്. ആരും തൊടുന്നതിഷ്ടമില്ലാത്തയാള്‍ പിന്നെന്തിന് ജനങ്ങള്‍ക്കിടയില്‍ ഇങ്ങനെ സിനിമയുടെ പ്രമോഷനിറങ്ങുന്നു എന്ന് ചോദിക്കുന്നവരും കുറവല്ല. ടോവിനോ അഹങ്കാരിയാണെന്നും ജാഡയാണെന്നുമെല്ലാം സമര്‍ത്ഥിക്കാന്‍ ശ്രമിക്കുന്നവരും ചില്ലറയല്ല. വീഡിയോ കണ്ട് സിനിമയിലെ നായകന്‍ യഥാര്‍ത്ഥത്തിലെ വില്ലനും, വില്ലന്‍ യഥാര്‍ത്ഥ നായകനായി എന്നുമാണ് പലരും പറയുന്നത്.

വിമര്‍ശനങ്ങള്‍ തനിക്കെതിരെ യാതൊരു ദാക്ഷിണ്യവുമില്ലാതെ പ്രവഹിച്ചു കൊണ്ടിരിക്കെ , ഇപ്പോഴിതാ വിശദീകരവും മാപ്പു പറച്ചിലുമായി ടോവിനോ തന്നെ രംഗത്തെത്തിക്കഴിഞ്ഞു. തന്റെ അന്നത്തെ പ്രചരണം തന്റെ അഹങ്കാരമോ ജാഡയോ അല്ലെന്നും വേദനിച്ചപ്പോള്‍ ഒരു പച്ചമനുഷ്യനായി പ്രതികരിച്ചുപോയതാണെന്നും വിശദീകരിച്ചാണ് ഇപ്പോള്‍ ടോവിനോ എത്തിയിരിക്കുന്നത്. അതാരെയെങ്കിലും വേദനിപ്പിച്ചെങ്കില്‍ ക്ഷമ ചോദിക്കുന്നുവെന്നും താരം ഫെയ്സ്ബുക്ക് കുറിപ്പിലൂടെ വ്യക്തമാക്കി. നല്ല സിനിമകളെ ജീവനുതുല്യം സ്‌നേഹിക്കുന്ന എത്രയോ പേരുടെ അനുഗ്രഹത്താലാണ് സിനിമയില്‍ നിലനില്‍ക്കുന്നതെന്ന് നല്ല ബോധ്യമുണ്ട്. പ്രൊമോഷന് വേണ്ടി തീയേറ്ററുകളിലും ക്യാമ്പസുകളിലുമൊക്കെ പോയപ്പോള്‍ എത്രയോ പേര്‍ സിനിമകളോടുള്ള അവരുടെ ഇഷ്ടം ഞങ്ങള്‍ക്ക് വേണ്ടിയുള്ള കാത്തിരിപ്പും കയ്യടിയുമാക്കി മാറ്റിയിരുന്നു. ഇനിയുള്ള സിനിമകളിലൂടെയും നല്ല കഥാപാത്രങ്ങളിലൂടെയും മാത്രമേ നിങ്ങളുടെ അളവില്ലാത്ത സ്‌നേഹത്തിനു പകരം നല്‍കാനാവൂ.  സ്‌നേഹം പ്രകടിപ്പിക്കുന്നതിനിടെ ആരോ ഉപദ്രവിച്ചപ്പോള്‍ പ്രതികരിച്ചിരുന്നു. വേദനിച്ചപ്പോള്‍ ഒരു പച്ചമനുഷ്യനായി പ്രതികരിച്ചുപോയതാണ്. അത് ജാടയോ അഹങ്കാരമോ കൊണ്ടായിരുന്നില്ലെന്നും ടോവിനോ ഫെയ്സ്ബുക്കില്‍ കുറിച്ചു.

എന്തായാലും അല്‍പ്പം ജാഡ കാണിച്ചെങ്കിലും ക്ഷമ പറയാന്‍ തോന്നിയ മനസ്സിനെ അംഗീകരിക്കുന്നുവെന്നും  വന്ന വഴി മറക്കാതിരിക്കണമെന്നുമാണ് ടോവിനോയുടെ പോസ്റ്റിനു ലഭിക്കുന്ന ആരാധക പ്രതികരണങ്ങള്‍

ടോവിനോയുടെ ഫെയ്സ്ബുക്ക് കുറിപ്പ് പൂര്‍ണരൂപത്തില്‍

പ്രിയപെട്ടവരെ,
നിങ്ങളില്‍ ഒരാളും നിങ്ങളെപ്പോലെ ഒരാളുമാണ് ഞാന്‍. ആഗ്രഹം കൊണ്ടുമാത്രം സിനിമാക്കൊതി മൂത്ത്, സിനിമയിലെത്തിയ ഒരാള്‍. പ്രേക്ഷകരില്‍നിന്ന് നല്ല വാക്കുകള്‍ കേള്‍ക്കാനാകുന്ന കഥാപാത്രങ്ങള്‍ എന്നും ചെയ്യാന്‍ കഴിയണമെന്നാണ് ഓരോ സിനിമയ്ക്ക് മുന്‍പും ശേഷവും ആഗ്രഹിക്കുന്നത്. നല്ല സിനിമകളെ ജീവനുതുല്യം സ്‌നേഹിക്കുന്ന എത്രയോ പേരുടെ അനുഗ്രഹത്താലാണ് സിനിമയില്‍ നിലനില്‍ക്കുന്നതെന്ന് നല്ല ബോധ്യമുണ്ട്. പ്രൊമോഷന് വേണ്ടി തീയേറ്ററുകളിലും ക്യാമ്പസുകളിലുമൊക്കെ പോയപ്പോള്‍ എത്രയോ പേര്‍ സിനിമകളോടുള്ള അവരുടെ ഇഷ്ടം ഞങ്ങള്‍ക്ക് വേണ്ടിയുള്ള കാത്തിരിപ്പും കയ്യടിയുമാക്കി മാറ്റിയിരുന്നു. ഇനിയുള്ള സിനിമകളിലൂടെയും നല്ല കഥാപാത്രങ്ങളിലൂടെയും മാത്രമേ നിങ്ങളുടെ അളവില്ലാത്ത സ്‌നേഹത്തിനു പകരം നല്‍കാനാവൂ. ഇതിനിടയില്‍ ചില മോശം അനുഭവങ്ങള്‍ കൂടിയുണ്ടായി. വീട്ടിലൊരാളെയോ കൂട്ടുകാരനെയോ പോലെ കണ്ട് എത്രയോ പേര്‍ സ്‌നേഹം പ്രകടിപ്പിക്കുന്നതിനിടെ ആരോ ഉപദ്രവിച്ചപ്പോള്‍ പ്രതികരിച്ചിരുന്നു. വേദനിച്ചപ്പോള്‍ ഒരു പച്ചമനുഷ്യനായി പ്രതികരിച്ചുപോയതാണ്. അത് ജാടയോ അഹങ്കാരമോ കൊണ്ടായിരുന്നില്ല . അതാരെയെങ്കിലും വേദനിപ്പിച്ചെങ്കില്‍ ക്ഷമ ചോദിക്കുന്നു.സിനിമയ്‌ക്കൊരു സത്യമുണ്ട്. നല്ല സിനിമകളും നല്ല കഥാപാത്രങ്ങളും മാത്രമേ എല്ലാ കാലത്തേക്കും നിലനില്‍ക്കൂ. മറ്റെല്ലാം കാലം തെളിയിക്കട്ടെ..?

ഈ ദിവസം നിങ്ങള്‍ക്ക് എങ്ങനെ? സൗജന്യമായി അറിയാന്‍ ഇവിടെ ക്ലിക്ക് ചെയ്യുക

DONT MISS
Top