ദില്ലിയില്‍ അന്തരീക്ഷ മലിനീകരണം രൂക്ഷം; ഹെലികോപ്റ്റര്‍ വഴി വെള്ളം തളിക്കാന്‍ ഹരിത ട്രിബ്യൂണല്‍ നിര്‍ദ്ദേശം

smog

ദില്ലി: ദില്ലിയിലെ അന്തരീക്ഷ മലിനീകരണങ്ങള്‍ തടയാന്‍ അടിയന്തര നടപടികള്‍ സ്വീകരിക്കണമെന്ന് ഹരിത ട്രിബ്യൂണലിന്റെ നിര്‍ദ്ദേശം. മലിനീകരണം തടയുന്നതിനായി ഹെലികോപ്റ്റര്‍ വഴി വെള്ളം തളിക്കണമെന്നും ഹരിത ട്രിബ്യൂണല്‍ നിര്‍ദ്ദേശിച്ചു. പൊടിപടലങ്ങള്‍ കുറയ്ക്കുന്നതിന് വേണ്ടിയാണിത്.

ദില്ലിക്ക് പുറമേ മൂന്നു സംസ്ഥാനങ്ങള്‍ക്ക് കൂടി ഹരിത ട്രിബ്യൂണല്‍ നിര്‍ദ്ദേശം നല്‍കിയിട്ടുണ്ട്. പഞ്ചാബ്, ഹരിയാന, രാജസ്ഥാന്‍ എന്നീ സംസ്ഥാനങ്ങള്‍ക്കാണ് ട്രൈബ്യൂണല്‍ നിര്‍ദ്ദേശം നല്‍കിയത്. അതേ സമയം 48 മണിക്കൂറിനുള്ളില്‍ അന്തരീക്ഷ മലിനീകരണം കുറയ്ക്കാനുള്ള നടപടികള്‍ സ്വീകരിക്കണമന്ന് കേന്ദ്രത്തിന് സുപ്രീം കോടതി നിര്‍ദ്ദേശം നല്‍കി.

അന്തരീക്ഷ മലിനീകരണത്തിന്റെ് തോതില്‍ ഉയര്‍ന്ന സാഹചര്യത്തില്‍ ഡല്‍ഹിയിലെ ജനങ്ങള്‍ വീടുകളിലിരുന്ന് ജോലി ചെയ്യുന്നതാണ് ഉചിതമെന്ന് ഡല്‍ഹി മുഖ്യമന്ത്രി അരവിന്ദ് കേജ്രിവാള്‍ വ്യക്തമാക്കിയിട്ടുണ്ട്. തലസ്ഥാനത്തെ സ്‌കൂളുകള്‍ക്ക് ബുധനാഴ്ച വരെ അവധി പ്രഖ്യാപിച്ചിരിക്കുകയാണ്. മലിനീകരണത്തോത് കുറയുന്നതു വരെ നഗരത്തിലെ നിര്‍മ്മാണ പ്രവര്‍ത്തനങ്ങള്‍ നിര്‍ത്തിവെയ്ക്കാനും അധികൃതര്‍ നിര്‍ദേശിച്ചിട്ടുണ്ട്. വായുമലിനീകരണം കാരണം ദില്ലിയുടെ പലഭാഗത്തും ജനങ്ങള്‍ക്ക് കണ്ണിനും, തൊണ്ടയ്ക്കും ശ്വാസകോശത്തിനും അസ്വസ്ഥതകള്‍ നേരിട്ട് കൊണ്ടിരിക്കുകയാണ്. അടുത്ത പത്ത് ദിവസത്തേക്ക് ഡീസലില്‍ പ്രവര്‍ത്തിക്കുന്ന വൈദ്യുതി ജനറേറ്ററുകളുടെ ഉപയോഗം ദില്ലിയില്‍ നിരോധിച്ചിരിക്കുകയാണ്. പൊടി ശല്യം കുറയ്ക്കാന്‍ പ്രധാന നിരത്തുകളില്‍ തുടര്‍ച്ചയായി വെള്ളം തളിക്കാനും നടപടികള്‍ സ്വീകരിച്ചിട്ടുണ്ട്. ദില്ലിയിലെ പവര്‍ പ്ലാന്റിന്റെ പ്രവര്‍ത്തനം നിര്‍ത്തി വെയ്ക്കാനും അധികൃതര്‍ നടപടികളെടുത്തിട്ടുണ്ട്.

മുമ്പ് നിലവിലുണ്ടായിരുന്ന ഒറ്റഇരട്ട അക്ക വാഹനങ്ങള്‍ നിരത്തിലിറക്കുന്നത് ഒഴിവാക്കാനുള്ള പദ്ധതി പുനരാരംഭിക്കാനും നടപടികള്‍ ദില്ലി സര്‍ക്കാര്‍ പരിഗണിച്ച് കൊണ്ടിരിക്കുകയാണ്. ലോക ആരോഗ്യസംഘടനയുടെ കണ്ടെത്തലനുസരിച്ച് ദില്ലിയിലെ മലിനീകരണ തോത് അനുവദനീയമായതിന്റെ 15 ഇരട്ടിയാണ്.

ഈ ദിവസം നിങ്ങള്‍ക്ക് എങ്ങനെ? സൗജന്യമായി അറിയാന്‍ ഇവിടെ ക്ലിക്ക് ചെയ്യുക

DONT MISS
Top